姊弟戀

今日同大家分享下人生哲學。我想討論「姊弟戀」。

我唔係幾認同「姊弟戀」呢個講法，你唔會聽到有人話「兄妹戀」，叫得做「姊弟戀」就係覺得奇怪或者不道德，好似「忘年戀」、「爺孫戀」、「師生戀」咁，因為大家覺得正常配搭係男大女細或者同齡，女大男細就唔正常，因為男人要大過女人，搵多啲錢，讀多啲書，飲多啲水……同埋男人無論幾歲都最鍾意十八歲嘅女人。有人話男人遲熟啲，搵個大啲嘅男人相處得舒服啲，呢個我唔認同，係二十歲初出茅廬嘅女仔易呃啫，中佬失控咪仲恐怖，男人幾歲都係要諗辦法manage架啦。

讓數據說話，女性預期壽命比男性大（大約）六年，女人預期壽命係八十幾歲，男人大概八十歲。如果女方細過男方幾年，好大機會喺七十頭嘅時候，要照顧一個七十中尾病緊嘅男人，然後佢八十死咗，你就要自己活到八十幾歲，即係絕大多數情況係你要照顧男方老病死，到你老病死嘅時候佢就已經走左。現實中都真係經常見到咁樣，真係好慘。社會上認為係理所當然，但對女人來講咁唔著數嘅野，大家千祈唔好中呢個騙局。統計上來講，男方細過自己六年，都只係好可能同年死咋。

所以，姊妹們，如果真係想搵個男人「白頭偕老」，而唔係照顧人地終老，係應該搵個細過自己嘅男人，「姊弟戀」先係王道。