塔利班嘅優點

上堂同學生討論，有個巴裔學生話佢支持塔利班，我問點解，佢話：「因為佢地阻嚇到啲唔跟伊斯蘭教規定嘅人，例如強姦會處決。」

我話：「其他政權唔會罰強姦咩，要靠塔利班？」

佢話：「佢地有做啲好嘅嘢，例如改善同巴基斯坦嘅關係，因為大家都憎美國。」

我：「吓？？？呢樣嘢咁重要？咁女性地位好差呢？唔緊要？」

佢：「佢地係跟伊斯蘭教規定。」

我：「咁女人無得讀書呢？」

佢：「係因為亂所以唔俾佢地返學，係保護佢地。」

我：「咁偉大，唔叫老師去佢地屋企教佢地？」

佢：「唔知。」

我：「塔利班仲有咩好？」

佢：「要大家跟返伊斯蘭教規定遮敝身體，女人要戴頭巾。」

我：「《古蘭經》無講要。」

佢：「有。」

我：「我識阿拉伯文，唔好拋我，邊一章邊一節？」

佢google完俾我呢段：「你們向先知的妻子們索取任何物品的時候，應當在帷幕（Hijab）外索取，那對於你們的心和她們的心是更清白的。（33:53）」

我：「呢段叫啲信徒唔好走入穆罕默德間屋嘅私人部分，點跳到全部女人要戴頭巾？」

佢：「我個教長有講，佢用我地嘅語言，啲字好深，我無辦法用英文翻譯俾你聽。佢話女人除咗眼之外都要遮晒，如果我有老婆的話我都要佢咁遮。」

呢啲教長咁鍾意阿富汗做咩唔投奔塔利班？點解要喺香港呢個咁腐敗嘅社會生活？一定係諗住要拯救呢度嘅迷途羔羊，真係好偉大。求真主體察佢嘅虔誠，送佢去阿富汗。