機械情人

睇咗《Ich bin dein Mensch（智理想情人）》，劇情係女主角做美索不達米亞研究唔夠經費，大學叫佢測試機械情人。女主角一路嫌機械人無意識，覺得佢度身訂造迎合買家，會令人失去社交能力。我覺得雖然現實中唔係真係咁容易接受，但係電影可以大膽啲，個point太普通。

成日有科幻片係人腦駁咗落一堆電流刺激出來嘅幻覺，但少啲科幻片懷疑意識本身，其實意識本身都可以只係一個simulation ，我覺得我有意識，都係因為我可以自言自語啫，咁AI對話程式都可以自言自語卦？憑咩話機械人無意識？

如果係physicalist嘅話，意識本身都唔係咩另外存在嘅嘢，機械人個input output點解唔算意識？甚至當有靈魂，如果係Buddhist dualist嘅話緣起性空，靈魂都係random aggregate啫，憑咩高級過機械人？唯一真係接受唔到嘅係Christian dualist，因為機械人唔係神造嘅。

我覺得個機械人最唔吸引個位係唔知有無autonomy，因為佢係照女主角嘅喜好設計，但佢自己學習之後都未必可以話無autonomy。

有朋友話《Her》好睇啲，於是去睇埋，我覺得美術、鏡頭好好，但唔係都好投入到個故仔，件事感覺好毒，成日phone sex，只能話拍得好過《Ich bin dein Mensch》少少。《Her》係男人同個把聲嘅電腦系統（嗰把聲係Scarlett Johansson，佢話佢係後製期間先錄，咁男主角同空氣演戲又真係幾勁），《Ich bin dein Mensch》係女人同個男機械人，《Black Mirror》第二季第一集Be Right Back都係，我覺得男機械人有說服力啲，因為男人比較似機械人。