我問佢十一點得唔得，我其實係話第二朝，佢以為係即晚（埃及人先係夜繽紛）；跟住我想約佢另一日夜晚七點半，但我寫錯八點半。係咁搞錯完全覺得無緣分不如唔好見，但我同自己講人地難得來到唔好咁衰，盡量見啦，其實係純粹花痴佢send語音把聲好聽。
我上完堂趕去見佢，但佢遲到又唔識路，我到咗佢先截的士來，啲的士佬唔想啋佢，我叫佢上車先再俾個電話我同個司機講目的地。搞咗一輪終於見到，埃及人真係好守時。
見到我就明點解無印象，因為讀工程唔係好有文化，但呢幾年對口音嘅觸覺更加敏銳，留意到呢啲就係埃及嘅有錢人，嗰個溫文嘅口音就係資產階級嘅氣息，喺我喺埃及常去嘅地方好少遇得到，因為佢地會係度假區、西餐廳嗰啲地方出沒。可惜佢唔文藝，如果讀詩俾我聽應該暈晒浪。好少聽到人講埃及話咁好聽，黎巴嫩人講嘢溫文就聽得多，埃及話係比較適合嗌交，所以我學埃及話。
佢話唔認得我因為我喺埃及著好多衫，我話：「因為喺埃及丫嘛。」
傾咗一輪兩地文化、生活，都有趣嘅，起碼佢見到香港係點，唔似喺埃及傾偈啲人都唔知我來自咩地方。佢來睇電子展，話覺得香港好有活力好舒服，簡直想留低喺度住，問我香港嘅一般收入同租金係點。近排開始同另一個法國人練法文，佢因為同香港人結婚所以來香港，做運動教練；問佢覺得香港點，佢又係話呢個地方好有活力。本地人眼中嘅不景氣，喺外地人嘅眼中，原來係好有活力。老實講我自己鍾意依家冷清啲，成街都係人好辛苦。
見完面我send message話好開心再見到佢、祝佢旅程順利之類，佢用語音覆，我話：「你把聲好好聽，呢啲係咪就係中產口音？」
佢話：「埃及依家無晒中產啦。」
我心諗即係上層啦。埃及係非常M型社會，上層永遠上層，窮人好難向上爬，好啲嘅出路基本上就係去海灣國家打工。而佢屋企開國際學校，佢舅父又周圍帶佢出差傾生意，瘟疫停課佢又自己搞貿易，好少遇到埃及人咁多業務，屋企應該好有人脈。
播佢嘅訊息俾阿拉伯文學生聽，聽完我問：「佢把聲係咪好好聽？」
學生反晒白眼：「妖，仲以為係listening，等我地聽得咁留心又聽唔明。」
沒有留言:
發佈留言