3P婚姻

叫前文提過嘅黎巴嫩朋友介紹啲當地朋友俾我識，佢問：「你到時係想旅遊多啲定想同人傾偈多啲，如果想同人傾偈多啲就每日安排兩個人見你，如果想旅遊多啲就每日一個。」 我話：「我兩樣都想，可以食晏見一個晚飯見一個，中間去睇景點。」

佢問：「咁你想見咩類型嘅人？我知你各方面都有興趣，政治、文化、音樂⋯⋯」

「係，全部都有興趣，唔好係保守派信徒就得。」

佢話：「因為黎巴嫩好多教派，所以唔同教徒經常辯論，嘗試合理化自己嘅信仰，所以都有趣嘅。」好少同人講阿拉伯文可以聽到啲咁有見地嘅講法，感謝真主。

「好啦，你咁講聽落都應該要見下。」

可能神聽到我地嘅對話，我第二日上堂就有學生向我傳福音。佢講嘅嘢入面最精采嘅部分係佢話以前自己好放縱，依家就覺得要結婚先可以有性行為。

佢話：「婚姻唔係淨係一夫一妻，要有神係入面，即係有三個entity先work。」

我仲以為基督教係一夫一妻制添，原來明光社呃9我。佢令到我想收返同黎巴嫩朋友講話可以見教徒嘅諗法。