美麗都．小埃及

美麗華、美麗都同Mirror有咩共通點？

大家都同尖沙咀有關？都算係。

不過我係想講三個嘅字根都係拉丁文嘅「睇」。

「美麗華」（miramar）原先係葡文西文地名，其實係解「海景」，「美麗」（mira）係拉丁語系嘅「睇」，mirror嘅字根都係同源，「華」（mar）就解「海」。大概因為尖沙咀喺海邊，所以尖沙咀咁多嘢叫「美麗華」。

埃及都有好多美麗華酒店同美麗華賓館，尤其喺都係位處海邊嘅亞歷山大港，仲有一本小說以「美麗華」命名，係馬哈福茲1967年既作品，以亞歷山大港入面同名小賓館為背景，講唔同階級嘅男女住客同職員之間嘅糾纏同是非。

同「美麗華」同理，「美麗都」（mirador）既意思係「睇風景既地方」，來自加泰隆尼亞文，「美麗」（mira）係拉丁語系嘅「睇」，「都」（dor）就係「地方」，簡單來講源自拉丁文嘅torium，例如audi-torium就係聽嘢嘅地方。尖沙咀既美麗都大廈，響重慶大廈附近，商場店鋪都相似，有幾間印度鋪，但就比較冷清。二樓就更加係好多鋪都無開門。

就係呢個半死嘅二樓，有一間埃及香水鋪Habibi，同一間埃及雜貨鋪Hummus and Olives。一層樓有兩間埃及鋪，真係好難得。一上樓梯就見到香水鋪，雜貨鋪就唔係咁易搵，我行咗幾個圈，結果都係問返同鄉----香水鋪嘅看鋪哥哥帶我行先搵到。

第一次去摸門釘，第二次先見到埃及女人看鋪，佢話每日下晝一點半至七點半都會開鋪（有幾信得過自行衡量）。我同佢傾咗幾句，不過無折頭。間鋪唔大，入面有橄欖、棷欖油、香料、芝麻醬tahini、芝士、雞豆（有乾豆有罐頭）、雞豆醬hummus、炸豆蓉餅（felafel）預拌粉、蠶豆、鹽水浸葡萄葉（用來做葡萄葉卷）等等。

比較驚喜嘅係有喺阿拉伯文叫「黑蜜糖」嘅蔗糖漿（英文molasses），將蔗汁一路煮乾就會變成蔗糖漿。二十世紀以前，因為白糖仲係好貴，蔗糖漿係比白糖常見；美國獨立戰爭導火線之一《糖法案》，主要課稅對象就係蔗糖漿，冧酒嘅原材料。

除咗蔗糖漿仲買咗幾盒沙地同約旦嘅椰棗（sorry主要唔係買埃及嘢，因為我都係比較懶，好麻煩嗰啲嘢買完通常都係擺，唔使煮嘅嘢最啱我），椰棗好甜好飽肚，但升糖指數唔高，有營養，係好方便嘅頂肚食物，食少少可以頂一餐，同原味乾果好夾。另外買咗茴芹茶（阿拉伯文yansun，英文anise），好暖胃。

最好再開多幾間鋪，賣衫、家品、首飾、書⋯⋯成個khan el-khalili加市中心搬過來，咁就可以補償下無得去旅行嘅遺憾。

-----
其實讀阿拉伯文都可以補償下無得去旅行嘅遺憾：
【零基礎阿拉伯文課程】
有意請電郵。

Youtube新片：
埃及生存手冊