香港人真係好需要性教育，尤其是個醫生

同人傾起覺得例行都應該做下性病檢查，上網查見到政府社會衛生科可以免費做，各區都有診所。諗住係咪要等好耐，結果嗰日去到係一登記就有得睇。

但個醫生講野都幾無厘頭，問上一次性行為係幾時，跟住問同邊個，點解做性病檢查。問同邊個真係覺得關你鬼事，係咪expect我同你講同嫖客做所以要檢查？其實與其咁問，係咪不如問下有無發生過咩覺得有風險嘅行為，同埋提醒如果受性侵應該搵咩機構求助？

入去brief完就出返去等一陣，再入去抽血同俾個尿液樣本樽你。

最搞笑嘅係三個禮拜後覆診睇結果，個醫生話：「你可以放心喇，所有測試都無事。」

我心諗，我例行檢查下啫，你講到我好擔心咁做乜？

但無報告可以攞走，如果要書面要俾錢申請返。我無記錯嘅話係驗左梅毒、淋病、愛滋、衣原體、滴蟲。

同朋友講起政府有免費性病檢查，佢地都問係咪去家計會做，搞笑嘅係家計會驗梅毒同愛滋反而係要收錢$250。

大家都可以得閒做下。

PS.朋友話佢男友話自己（之前係）A0唔使做，我話佢可能A0但接受過性服務呢，0係計拍拖架嘛？咁根據定義都應該係A0喎。