父權定歧視？

話說有個朋友A，我唔講佢邊度人啦，費事顯得我歧視佢。

A係X大研究員，有一日佢、我同另一個X大研究員B一齊傾偈，A問B：「你識唔識X大哲學系啲人，我想搵人教下我哲學同埋可能合作下。」

B話：「Alicia咪X大哲學系畢業㗎囉，你唔問佢？」

之後我send message俾A：「或者我可以介紹我以前個老細俾你識？不過你有哲學問題點解唔問我，係咪女人唔夠叻？」

幾個月後佢忽然講返呢件事，話佢好嬲，問我點解咁講。

我話：「你個人好好，不過有啲父權。」

佢話：「你係racist。」

我話：「咁你點解唔問我呢？如果我係你面前問另一個人可唔可以介紹個人俾我問你嗰科嘅野，你會覺得點？係咪專登當你透明？」

佢話：「如果你好好地問我我就會答你，因為你依家唔喺X大，所以無搵你。」嘩真係好有價值嘅資訊，要好好地問佢先可以提供。

我話：「咁你都係當我透明啦，我唔係問你點解唔問我介紹人俾你識，係點解唔問我本人。」

佢話：「我唔問你係因為同你傾過覺得你講哲學無深度，唔係因為你係女人。你有偏見，屈我父權，你要道歉。」

做人真係難，講得深又聽唔明，講得淺又無深度（講笑）。我諗係因為我之前質疑佢伊斯蘭教義問題，所以佢條氣唔順，覺得我唔識。

同朋友講起，佢話：「佢咁小氣係咪鍾意你？」

我想話：「係幾cute（幼稚嗰隻），有啲偶像劇feel。我都想咁諗，會開心啲，而唔係成日覺得要忍住唔可以講野，唔捧住啲人個玻璃心就無朋友做。」